Endrit Krasniqi dhe Gledi Mici ishin larguar së fundmi nga FC Prishtina, pas krizës së thellë financiare në të cilën gjendet klubi më i madh në vend.
Por, duket se në orët e fundit gjithçka ka ndryshuar.
Trajneri i ri i prishtinasve, Ismet Munishi e ka bërë një postim në rrjetet sociale, duke e paralajmëruar në njëfarë mënyre rikthimin e mesfushorit ofanziv dhe të mbrojtësit të majtë në klubin Bardhekaltër.
Edhe pse FC Prishtina nuk e ka bërë ende asnjë njoftim zyrtar për një lajm të tillë, Krasniqi dhe Mici mund ta veshin fanellën e kryeqytetasve në elitën e futbollit të Kosovës edhe sezonin e ardhshëm.
Thuhet se kryesia e klubit e ka shlyer një pjesë të borxhit apo krejt atë, të këtyre dy lojtarëve, të cilët më pas u bindën të vazhdojnë të luajnë në stadiumin “Fadil Vokrri”.
Në javët e fundit lojtarët kryesorë e paralajmëruan largimin nga Prishtina, e cila e kaloi një sezon të tmerrshëm dhe dëshpërues, duke mbetur edhe jashtë garave evropiane për sezonin e ardhshëm.
Natyrisht, trajnerin Munishi e pret një punë mjaft e vështirë nëse klubi nuk lëviz me përforcime të mëdha gjatë verës që po vjen.
