Paul Pogba është rikthyer zyrtarisht te Juventus teksa të shtunën mesfushori përfundoi me sukses vizitat mjekësore para se të firmosë kontratën trevjeçare me një pagë prej tetë milionë eurosh.
Francezi rikthehet të veshë fanellën bardhezi pas gjashtë vitesh, ndërsa kërkon të rigjejë edhe versionin e tij më të mirë duke qenë se të Manchester United nuk mundi për asnjë moment të përshtatej.
Madje, 29-vjeçari u vendos edhe në qendër të kritikave për rezultatet e dobta të “Djajve të Kuq” dhe në këtë formë pati një lamtumirë plot me mëri ndaj klubit dhe tifozëve anglezë. Madje, inati duket se nuk i ka dalë ende.
Teksa u prit nga mijëra tifozë në qendrën sportive të Juventus ku nuk ngurroi të firmoste bluzat e fanellës italiane, aty mes turmës spikati edhe një bluzë e Manchester United. Por, Pogba refuzoi kategorikisht ta firmoste ndërsa një gjest i tillë ka bërë shumë bujë në shtypin britanik që sërish është rikthyer të”kapet” me mesfushorin.
