Situata e Robert Lewandowskit ka arritur në pikën që polaku nuk donte kurrë. Sulmuesi është dashur të paraqitet dje në ambientet e Bayern Munich për t’iu bashkuar përgatitjeve parasezonale të skuadrës bavareze, pavarësisht se ka përsëritur në mënyrë aktive dhe pasive se dëshiron të largohet.
Ai ka kaluar kontrollet mjekësore dhe është ushtruar sot prej orës 10:00. Të gjithë e dinë që nuk është ajo që do, por sulmuesi nuk dëshiron të deklarohet as në mungesë. Ai beson se do të arrihet një marrëveshje që të largohet nga ekipi bavarez. Polaku e kupton që ka bërë shumë nga ana e tij dhe shpreson që Barça tani do të përgjigjet.
Perspektiva nuk është e këndshme as për Bayernin. Gjermanët duan që ai të qëndrojë, por nuk do ta detyrojnë dhe i kanë vënë një çmim prej 50 milionë eurosh. Barça synon ta ulë këtë shifër, por gjermanët janë veçanërisht të vendosur për ta arritur atë. Bavarezët po e vështirësojnë skajshëm operacionin.
Në çdo rast, në zyrat e klubit gjerman e kanë të qartë një gjë: kjo telenovelë duhet të zgjidhet këtë javë. Konkretisht, para të shtunës, kur prezantohet skuadra. Nëse ai do të largohet, duhet të ndodhë para kësaj date. Nuk duket si një pjatë e shijshme ta nisësh sezonin e ri me fansat e inatosur për atë që deri vonë ishte idhulli i tyre.
Kështu, negociatat duhet të intensifikohen këto ditë. Xavi gjithashtu dëshiron që situata të zgjidhet sa më shpejt. Ai, nga këndvështrimi i tij si trajner, shpreson që sulmuesi të mbërrijë sa më shpejt dhe të mund t’i bashkohet turneut amerikan të ekipit. Azulgranat nisen këtë fundjavë për në Miami dhe trajneri nga Terrassa dëshiron ta ketë me vete “9” e ri të skuadrës që drejton.
