Elvedin Heriç po përgatitet për pjesëmarrjen me Vllazninë në Ligën e Konferencës në këtë të enjte, por mesfushori boshnjak i kuqebluve ka gjetur kohë për të biseduar me mediat në vendlindje për një tjetër skuadre të Superiores, Tiranën, e cila përballet sot me kampionen e Bosnjë Hercegovinës, Zrinjski Mostar.
Sipas tij, eliminimi nga Liga e Kampioneve i bardhebluve ishte një surprizë, pasi mendonte se ata kishin cilësinë për të vazhduar më tej.
“Ishte një surprizë për mua. Nuk di ta them me të vërtetë se si ndodhi, pasi besoja se do të justifikonin statusin e tyre të favoritëve pa probleme. Ata kishin mundësi të ndryshme në ndeshjen e kthimit kur rezultati ishte 0-0 dhe nëse do të kishin shënuar, jam i sigurt se do të ishin kualifikuar”, tha Heriç për SportSport.ba.
“Ata nuk e kanë ndryshuar shumë skuadrën në krahasim me vitin e kaluar, kanë afruar dy lojtarë, por kam dëgjuar se do të shesin disa futbollistë pas ndeshjeve në Europë. Ata luajnë mirë kur dalin para, kanë lojtarë të shpejtë dhe kërkojnë vazhdimisht të gjejnë thellësinë. Zrinjski duhet të tregohet i vëmendshëm ndaj kësaj mënyre loje.
Nga ana tjetër, mbrojtja është pika më e dobët e ekipit. Ata kanë vetëm një stoper të mirë, ndërsa sipas mendimit tim nuk janë të mbuluar siç duhet në pjesë të tjera të mbrojtjes. Rezultati do të jetë i pasigurt, por besoj se Zrinjski mund të kualifikohet. Gjithsesi, lojtarët e kampionëve tanë duhet të jenë të përqendruar në ndeshje që në momentin kur gjyqtari i bie bilbilit për herë të parë. Çdo relaksim mund t’u kushtojë shtrenjtë”, tha mesfushori i Vllaznisë.
Ai bëhet gati gjithashtu për pjesëmarrjen në Ligën e Konferencës me Vllazninë, ku shorti e ka vënë përballë Universitatea Kraiovës.
“Ne shpresojmë për tmë të mirën por jemi gjithashtu realistë, ata janë favoritë. Por ne jemi përgatitur mirë dhe do të mundohemi të ekuilibrojmë gjërat. Ta shohim, do i lëmë atyre rolin e favoritëve, por ne padyshim që nuk do të zhgënjejmë tifozët tanë”, deklaroi lojtari.
