Një burrë i mirë që tmerron. Një trajner me një ide loje të ngurtë, por edhe fleksibël. Me pak fjalë, mund të duket si përshkrim i një personazhi të paqëndrueshëm, për ta thënë më butë. Në vend të kësaj, është ai … i Jurgen Klopp.
Trajneri i Liverpool është gjithmonë një temë interesante diskutimi, duke qenë ndër më të respektuarit në botë, shkruan Telesporti.
Nuri Sahin është fjalë për fjalë i dashuruar me ish-trajnerin e tij dhe këtë e dëshmon një anekdotë kur Klopp e përjashtoi atë nga stërvitja te Borussia Dortmund.
Mesfushori tha për Goal pak kohë më parë: “Ishte viti 2009 ose ndoshta 2010. Unë luaja për Borussia Dortmund dhe trajneri më përjashtoi nga stërvitjet. Më tha të largohesha sepse kisha debatuar me një lojtar tjetër.
“Isha i ri dhe mendoja se dija tashmë gjithçka. Isha i sigurt se kisha të drejtë, por ai më tha të largohesha dhe u largova. Të nesërmen mendova se po më largonte nga ekipi ose çfarëdo tjetër. Ai erdhi dhe në vend të kësaj dukej se asgjë nuk kishte ndodhur kurrë.
“Në atë moment e kuptova se ai do të ishte në anën time edhe kur gaboja. Është e mrekullueshme kur e sheh atë në trajnerin tënd. Mendoj se njerëzit janë të bezdisur për sa shumë flas për të!
“Por ishte e një rëndësie të madhe për mua. Pyetni djemtë në Dortmund, djemtë në Mainz dhe Liverpool, ata do t’ju thonë të njëjtën gjë.”
Sahin vazhdon: “Nuk ka dyshim për aftësitë e tij si trajner, ai është vërtet i mirë. Por ajo që më pëlqen më shumë tek ai është se ai është njeri. Ai të godet nga pikëpamja njerëzore. Nëse të pyet ‘si je?’, nuk e bën sa për të pyetur.
“Ai pyet me zemër dhe nëse ke ndonjë problem është aty, gati ta zgjidhë për ty. I intereson. Mund të jetë ndonjëherë e vështirë, sigurisht, por të nesërmen do të jetë sikur asgjë të mos ketë ndodhur.
“Kjo është ajo që mësova prej tij: nëse dëshiron të jesh trajner për një kohë të gjatë, duhet të jesh edhe një person i mirë sepse lojtarët e ndjejnë këtë. Nuk mund të gënjesh dhe ai nuk të gënjen”.
Shkurtimisht, ai nuk është një trajner që të lë indiferent: Sahin duket gati të hidhet në zjarr për Klopp dhe sigurisht nuk është i vetmi pasi është gati të thërrasë edhe dëshmitarë të tjerë me “pyesin lojtarët e Borussia, Mainz. dhe Liverpool”.
