Largimi i Kasemiros nga Reali i Madridit drejt Mançester Junajtidit ka qenë një nga lajmet më të befasuese në merkaton e verës. Casemiro-Modriç Kroos i pagëzuar me nofkën “Trekëndëshi i Bermudës” nga ana e trajnerit Carlo Ancelotti, tashmë nuk ekziston më. Dhe natyrisht që largimi i brazilianit drejt “Djajve të Kuq” vazhdon të jetë temë diskutimi në Madrid.
Një nga personat më të afërt të Kasemiros te Reali ka qenë shoku i repartit, Toni Kros. Ai ka qenë ndër të parët që ka reaguar pas lajmit.
Madje, vetë braziliani në konferencën e lamtumirës tha se gjermani i kishte shkruar një SMS në orën 04:00 të mëngjesit.
Mesfushori 32- vjeçar ka folur sërish për mediat spanjolle, duke vijuar të tregohet i habitur me vendimin e marrë nga Kasemiro.
Mesfushori gjerman, mes shakasë dhe ironisë ka thumbuar ish-shokun e tij.
“Largimi i Casemiros dhe vendimi i tij më befasoi shumë. Ai është një i çmendur! Nga pikëpamja sportive, ndryshimi i Champions në Europa League është një ndryshim i madh”, ka thënë Toni Kros. Por natyrisht që ngacmimet e gjermanit më së shumti janë në kuadrin e shakasë, pasi të dy lojtarët kanë një miqësi të fortë mes tyre.
Transferimi në Premier Ligë te Manchester UtdI, në fakt është një bast i madh që Casemiros ka vënë me veten dhe karrierën e tij si futbollist. Ai ka lënë “zonën e komfortit” për të provuar një sfidë të re edhe pse duhet thënë se ajo paraqet jo pak pengesa. Jeta jashtë Madridit mund të jetë delikate për brazilianin, teksa kujtojmë se dhe dyshja tjetër ish-madrilene, Varan dhe Kristiano Ronaldo nuk e kanë pasur të lehtë në “Old Trafford”.
