Besojeni ose jo, teksa Reali i Madridit pret Betisin sot pasdite në “Bernabeu” kampionët në fuqi të Spanjës kanë 5 sezone pa fituar kundër andaluzëve në Madrid.
E për më shumë akoma, kanë 5 vjet që nuk arrijnë t’u shënojnë qoftë dhe një gol bardhejeshilëve. Betisi është kthyer në një mace e zezë për Madridin.
Suksesi i Realit kundër Betisit është kthyer në një utopi.
Gjithçka nisi më 20 shtator të vitit 2017.
Ishte java e pestë në La Liga, me Realin që kërkonte fitoren e parë në shtëpi pas dy barazimeve 2-2 ndaj Valencias dhe 1-1 ndaj Levantes.
Në atë që duhej të ishte takimi i kthesës për Realin, u shfaq Sanabria që i jepte fitoren Betisit në Madrid në kohën shtesë.
Që nga ai takim, Betisi nuk ka humbur asnjë takim në “Bernabeu”, madje duke mos pësuar asnjë gol!
E të mendosh që Reali ka tentuar 72 gjuajtje drejt portës së Betisit në këto 5 takime, me një mesatare një gjuajtje çdo 6 minuta, por në fund zero gola. Sot në Madrid luhet kapitulli VI.
