Çmimi i aksioneve në bursë të Manchester United është rritur me 530 milionë £ gjatë muajit të fundit. Disa faktorë kanë kontribuar në rritjen, duke përfshirë spekulimet rreth një shitjeje të mundshme të klubit.
Çmimi i aksioneve të United në bursën e Nju Jorkut tani vlerësohet në 14,30 dollarë (12,46 £), nga 11,48 dollarë (10,01 £) pas javës së parë të gushtit.
Kjo përfaqëson një rritje prej rreth 25 për qind në vetëm një muaj, që është e barabartë me një rritje në vlerë prej rreth 530 milionë sterlina.
Kjo do të thotë gjithashtu se çmimi i aksioneve të United është më i lartë se oferta e tij fillestare kur u lançua në NYSE në gusht 2012, kur u vlerësua në 14,00 dollarë (12,20 £).
Është hera e parë në disa muaj që çmimi i aksioneve ka tejkaluar ofertën fillestare dhe besohet se ndikohet nga raportet për një blerje të mundshme të klubit.
Në gusht, bisedat për miliarderin britanik Jim Ratcliffe që planifikonte një ofertë blerjeje, rriti çmimin e aksioneve me 15 për qind.
Kjo pasoi një rritje prej 12 për qind në çmimin e aksionit pasi ish-drejtori Michael Knighton njoftoi planet për një marrje “armiqësore” të klubit.
Është një kthesë e fortë për klubin nga momenti kur aksionet ranë në një nivel rekord prej 11.07 dollarë (9.60 £) më 13 qershor – një rënie prej 1.3 miliardë £.
Ajo rënie erdhi në fillim të merkatos së transferimeve – përpara se klubi të shpenzonte shumë për blerjen e gjashtë lojtarëve të rinj.
Casemiro, Antony dhe Lisandro Martinez mbërritën për 212 milionë sterlina së bashku – një shenjë që Glazers janë të përgatitur të fusin dorën në xhep.
Në të kundërt, në tetor të vitit të kaluar Glazers nxorën në shitje 9.5 milionë aksione të United, që barazohet me 137 milionë sterlina të aksioneve në klubin Old Trafford.
Ratcliffe gjithashtu mendohet se është i përgatitur të investojë shumë në klub nëse ai bëhet pronar, duke përfshirë rinovimin e Old Trafford.
