Milani vazhdon të përballet me rinovimin e Rafael Leaos, me kontratën e portugezit që skadon në vitin 2024. Sipas “Corriere dello Sport”, agjenti i lojtarit, Jorge Mendes, ka bërë një kërkesë rreth 7 milionë euro në sezon për klientin e tij.
E gjithë çështja lidhet me gjobën që numri 17 i kuqezinjve duhet t’i paguajë Sporting Lisbonës, një shifër që është rreth 9 milionë euro. Gjithashtu për këtë do të kishte një kërkesë nga rrethi i lojtarit për klubin kuqezi që nënkupton pagesën e gjobës.
Milani është shumë i kënaqur me lojtarin, ndaj nuk dëshiron ta lërë të ikë. Megjithatë, është e nevojshme të lëvizet sa më shpejt dhe Cardinale duhet të kuptojë nëse ia vlen të bëjë pak më shumë përpjekje ekonomike për lojtarin e tij më të mirë.
Cikli i rinovimeve vijoi dje me Sandro Tonalin, që është zyrtarisht një flamur i ri i Milanit. Kontrata deri në verën e vitit 2027, paga e dyfishtë për “Pirlon e ri”. Pas asaj të Rade Kurniç, një tjetër rinovim i Milanit në muajt e fundit, që pasoi Fikayo Tomori. Tani është koha për dy rastet më të mprehta.
Veç Leaos, synimi i klubit kuqezi është që të zgjasë kontratën e Ismael Bennacer, e cila skadon në vitin 2024. Lojtari algjerian po luan një rol edhe më qendror në mesfushën e kuqezinjve dhe po e dëshmon ndeshje pas ndeshjeje.
Maldini dhe Massara po punojnë për të zgjatur marrëveshjen deri në vitin 2026 ose ndoshta edhe në vitin 2027, duke dyfishuar pagën e lojtarit: nga 1.7 në 3.5 milionë euro në sezon. Kërkesa e Bennacer prej 4.5 tani për tani është një hendek për t’u kapërcyer, për të kuptuar nëse do të ketë edhe një klauzolë lirimi.
