Kombëtarja e Shqipërisë ka lënë pas krahëve humbjen në Izrael dhe fokusi është kthyer te dueli i fundit në Nations League ndaj Islandës.
Kuqezinjtë kanë zbarkuar sot në Shqipëri në orën 15:00, teksa në orën 18:00 është kryer seanca e parë stërvitore anti-Islandë.
Lojtarët që u aktivizuan si titullarë, kanë zhvilluar një seancë me ngarkesë minimale, ndërsa të tjerët kanë marrë ngarkesë të plotë.
Gazetarja e SuperSport, Albana Bejko raporton se dy lojtarë të Kombëtares janë në dyshim për shkak të problemeve fizike: Arlind Ajeti dhe Myrto Uzuni, aktivizimi i të cilëve nuk është i sigurt për duelin e radhës.
Shqipëria pret Islandën në “Air Albania” të martën e 27 shtatorit, duke nisur prej orës 20:45, përballje që do transmetohet në SuperSport 2.
Fitorja në këtë ndeshje na siguron vendin e dytë në Grupin 2 të Ligës B.
