Prej dy ditësh punon me organikën, por Stefano Pioli ka shumë dyshime mbi formacionin që do të hedhë në fushë ndaj Empolit të shtunën në 20:45. Cilësia e rivalit mund të jetë kurth dhe trajneri i Milanit i druhet ndonjë surprize të shëmtuar.
Dyshimi më i madh është për krahun e majtë ku mungon Teo Hernandez. Balo Ture është kandidati kryesor, teksa edhe Serxhinjo Dest mund të luajë në atë rol, të cilin e mbuloi edhe në miqësoren mes SHBA-së dhe Arabisë Saudite.
Tomori, Kalulu dhe Kalabria do të mbulojnë paketën e tërhequr, teksa në portë do të debutojë Siprian Tatarushanu, pasi Menja është i dëmtuar dhe rikthehet pas 3 javësh.
Mesfusha do t’i besohet Benaserit dhe Tonalit që e ka marrë veten nga dëmtimi.
Pa alternativa në sulm, Zhiru do të jetë përsëri titullar i mbështetur nga Leao, De Ketelare dhe Salmakers.
Ndërkohë, në luftë me kohën për stolin janë Rebiç dhe Origi, që dje punuan në mënyrë të diferencuar.
