Arrigo Sacchi, një ish-trajneri i madh i Milanit, foli për “Gazzetta dello Sport”, ku ndër të tjera komentoi trajnerin aktual të kuqezinjve, Stefano Pioli.
Kjo është një pjesë e fjalëve të tij për këtë çështje: “Kur mbërriti në Milano më dukej si një trajner në procesin e stërvitjes. Në vitin 2020 dihej se kuqezinjtë kishin zgjedhur Rangnick, ai kurrë nuk tha asnjë fjalë pa vend.
Ai kurrë nuk u shfry. Ai kurrë nuk sulmoi klubin. Stefano është me të vërtetë një zotëri… Ai ishte “taktik”, tani është një strateg. Një kapërcim i madh falë vullnetit dhe përulësisë së tij.
Titulli ishte një kryevepër, ai fitoi dhe mbajti bilancin në vend. Dhe këtë e bëri me lojtarë pak të njohur, duke i dhënë organizim të gjithë grupit”.
Ndërkohë, Brahim Diaz ka marrë skenën e momentit te kuqezinjtë. Kjo, falë golit alla Messi kundër Juventusit, siç e përcakton “Corriere della Sera”. Mesfushori-sulmues donte t’iu kujtonte të gjithëve se dëshiron të luajë.
Ardhja në verë e të paracaktuarit De Ketelaere e penalizoi, duke e zbritur shpeshherë në stol. Të shtunën shfrytëzoi në maksimum shansin e tij. Ai dëshiron t’i bindë të gjithë se Milani e meriton.
Verën e ardhshme, Maldini do të duhet të vendosë nëse do ta blejë përfundimisht apo jo për 22 milionë euro, me Realin që në këtë rast do të ketë ende opsionin e kundër-shlyerjes në moshën 27-vjeçare.
Tashmë, Brahim duhet të ketë vazhdimësi, si gjithë Milani, duke nisur nga ndeshja e nesërme në Champions League, ku është ende në balotazh me De Ketelaere.
