“El Clasico” e së dielës do të jetë një përballje e skuadrave kryesore në Primera. Barcelona si lider, për shkak të golavarazhit më të mirë, do të vizitojë Real Madridin, me shpresën për të “kuruar” dështimin në Champions League.
Madridi është kampion aktual dhe po luan në shtëpi, ndaj pritet të jetë paksa favorit. Carlo Ancelotti shpalli derbin e parë të madh në futbollin spanjoll.
“Ndeshja e vitit të kaluar nuk është e rëndësishme. Është një ndeshje në një sezon tjetër. Nuk do të jetë një duel jetë a vdekje, është një takim i veçantë, por sezoni është shumë i gjatë.
Ndeshjet e tilla zakonisht përgatiten. Bëhet fjalë për dy skuadra të mëdha. Si çdo derbi tjetër, është një ndeshje e veçantë, por përgatitet njësoj si të tjerët. Duhet të shtoni aspekte emocionale, presion…
Historia e Barçës flet qartë. Ata ndjekin një stil që kënaq tifozët dhe klubin. Është një ide futbolli që ata kanë, u jep sukses dhe vazhdojnë ta ushqejnë. Skuadrat e tjera mendojnë ndryshe. Ajo që dua të them, për mua, të kesh vetëm një stil nuk është gjëja e duhur. Lojtarët ndryshojnë. Kryesorja është që lojtarët të ndihen rehat me stilin që luajnë”, tha strategu italian.
Derbi është planifikuar për këtë pasdite me fillim nga ora 16:15. Në ndeshjen e fundit të zhvilluar në kryeqytet, Barça luajti një ndeshje fenomenale larg rivalit të madh dhe festoi në mënyrë bindëse, diçka që me siguri e dëshiron sërish Xavi Hernandez.
