Ronaldo, ai i ashtuquajturi Fenomeni ishte i pranishëm në ceremoninë e Topit të Artë në Paris, aty ku triumfoi Karim Benzema.
Braziliani nuk ngurroi të jepte një prononcim të shkurtër për SportMediaset, teksa theksoi se ai mbetet një i sëmurë pas futbollit. Nga ana tjetër, Ronaldo flet edhe për Serie A ku shtoi se Napoli mund ta udhëheqë aktualisht renditjen, por kampionati mbetet i gjatë.
“Unë e ndjek shumë kampionatin italian, Interin. Shoh shumë futboll, jam edhe pronar i dy klubeve, një në Brazil dhe një në Spanjë. Mund të them se jam i sëmurë pas futbollit.
Napoli kryesues në Serie A? E vërtetë, por kampionati është shumë i gjatë dhe para ka shumë ndeshje. Unë e pashë Interin në të dyja ndeshjet ndaj Barcelonës, ia dolën shumë mirë.
Zhvilluan dy ndeshje gjigande kundër një skuadre si Barcelona që të gjithë e dinë se çfarë kualiteti ka. Zikaltërit mund të bëjnë mirë edhe në kampionat”, u shpreh Ronaldo.
