Në prag të ndeshjes së javës së 13-të të elitës së futbollit të Kosovës, Drita – Ferizaj, skuadra nga Gjilani ka mbajtur konferencë për media, ku foli kryetrajneri Ardian Nuhiu.
Ai tha se nga ndeshja e nesërme duhet të kthehemi te fitorja.
“Djemtë po punojnë shumë dhe nga ndeshja e nesërme presim të kthehemi te fitorja dhe te realizimi i golave.
Nuk diskutohet nuk do të jetë aspak e lehtë, kundërshtari pavarësisht rezultateve të fundit ka futbollistë cilësorë. Ne duhet të marrim mësim nga ndeshja e fundit me ta, ku na barazuan dhe na morën një pikë.
respektin maksimal për kundërshtarin e nesërm, sepse ka futbollistë që dikur ishin pjesë e jona. Por, ne duhet që me qasje maksimale serioze të kthehemi te fitorja. Dhe që nesër të harrojmë ndeshjen e fundit dhe të vazhdojmë kampionatin”, ka thënë Nuhiu.
Gjatë konferencës u diskutua edhe për ndeshjen e kaluar dhe nga pyetjet e gazetarëve u kërkua shpjegim për atë se çfarë nuk shkoi në ndeshjen e xhiros së 12-të.
Në këtë rast, timonieri tha se ishte një ndeshje e luftuar, një derbi me jo shumë raste shënimi, por ndeshje e kujdesshme nga të dyja skuadrat.
“Një derbi jo gjithmonë sjell raste të pastërta, sepse skuadrat janë të përqëndruara. Nuk diskutohet që pas kartonit të kuq u vështirësuan gjërat për ne.
Ne ishim të detyruar të mbledhim skuadrën, por me shumë përgjegjësi dhe kompaktësi skuadra është përgjigjur dhe nuk kemi lejuar që kundërshtari të na rrezikojë, ndonëse shënuam të parët e në fund nuk morëm maksimumin.
Ndeshje të tilla realisht në futboll ndodhin shumë rrallë dhe të marrësh dy gola për një minutë duhet të jesh shumë i pa fat dhe këtë besoj e di edhe kundërshtari.
Mendoj se gjatë rrugës do të ketë pengesa jo vetëm për ne, por pas këtyre humbjeve duhet të tregohesh skuadër e madhe, të gjesh forcë të ngritesh dhe të vazhdosh rrugën drejt qëllimit tënd apo drejt suksesit”, theksoi Nuhiu.
Ndeshja Drita – Ferizaj zhvillohet të shtunën, në orën 13.00 në Stadiumin Ndihmës (te rrethi).
Drita kryeson me 27 pikë dhe Ferizaj është në fund me 8 pikë pas 12 jave në elitën e futbollit të Kosovës.
