Sonte me fillim nga ora 21:00 stadiumi “Maksimir” do të jetë nikoqir i ndeshjes tejet interesante mes Dinamo Zagrebit dhe Milanit, e vlefshme kjo për xhiron e pestë të fazës së grupeve të Ligës së Kampionëve.
Fitorja sot për “Rossonerët” është jetike, pasi që do të mbante gjallë shpresat për kualifikim tutje në fazën e eliminatoreve, raporton KosovaPress.
Në xhiron e fundit të kësaj gare, Milani u mposht 2:0 nga Chelsea, kurse Dinamo Zagrebi barazoi 1:1 me RB Salzburgun.
Takimi i fundit mes këtyre dy skuadrave daton muajin e kaluar, ku asokohe Milani regjistroi fitore me rezultat 3:1 kundër Dinamo Zagrebit.
Sa i përket ndeshjes së sotme, mungesa të lojtarëve do të ketë vetëm te Milani, ku nuk do të paraqiten Calabria, Florenzi, Ibrahimovic, Maignan, Saelemaekers dhe Tomori.
Tanimë të dy trajnerët kanë publikuar formacionet me të cilat do ta fillojnë ndeshjen e sotme, dhe ato zyrtare i gjeni më poshtë.
Dinamo Zagreb (3-5-2): Livakovic; Peric, Sutalo, Ristovski; Ljubicic, Ademi, Misic, Ivanusec, Moharrami; Orcis, Petkovic
AC Milan (4-2-3-1): Tatarusanu; Kalulu, Gabbia, Kjaer, Hernandez; Tonali, Bennacer; Rebic, De Ketelaere, Leao; Giroud