Në prag të garës së fundit sezonale që zhvillohet ditën e diel në Abu Dhabi ka ardhur lajmi se Mattia Binotto nuk do të jetë më drejtori sportiv i Ferrari.
Vendin e tij do ta zërë shefi i Alfa Romeo, Frederic Vasseur. Vendimi për të larguar Binoto vjen pas gabimeve të shpeshta në strategji që ka bërë “kokëkuqja” këtë sezon të Formula 1, që i kanë kushtuar shtrenjtë.
Vasseur, 54 vjeç, ishte kërkuar që vjet nga Ferrari, por transferimi nuk u konkretizua.
Ky transferim do të thotë një revolucion i madh te skuadra italiane, që afron një personazh që ka më shumë përvojë në menaxhimin e garave, përfshi edhe kategori të vogla, krahasuar me Binotto. Ky i fundit ka vite që punon për Ferrari, pasi më herët ka qenë shef i sektorit teknik të garave.
Binotto mbyll kështu një cikël 4-vjeçar me “kokëkuqen”, ku qëndron në krye të saj prej vitit 2019. Ai ka meritën se këtë sezon riktheu Ferrari në nivelet e dikurshme pas dy sezonesh zhgënjyese, por makina italiane nuk dueloi dot për titullin. interesant fakti se Leclerc debutoi në Formula 1 me Sauber, kur drejtori sportiv i garave ishte pikërisht Vasseur.
