Lionel Scaloni dhe Argjentina kanë sot në mbrëmje një provë zjarri ndaj Polonisë, në ndeshjen e fundit të grupit që do të jetë vendimtare për sa i përket kualifikimit, për të cilin çdo skenar është i mundshëm në Grupin C.
Në konferencën e zakonshme për shtyp, trajneri foli mbi atë që pret nga kjo sfidë, duke treguar edhe përshtypjet e tij mbi rrugën që i pret në rast kualifikimi, pa lënë mënjanë duelin Leva-Mesi dhe emrat e përveçëm të skuadrës së tij.
“Presim një ndeshje të vështirë. Polonia është një ekip që mbyllet shumë mirë dhe gjithashtu krijon situata të vështira për t’u përballuar në zonën kundërshtare. Ideja jonë është shumë e qartë, do të përpiqemi të mbrojmë topin dhe të jemi të përqendruar.
Nuk e di ende si do të pozicionohet skuadra, por nuk mendoj se do të ndryshojë shumë nga ajo që pamë me Meksikën.
Kam marrë përgjigjet e duhura gjatë këtyre ditëve dhe mendoj se jemi gati. Ajo fitore me Meksikën na injektoi shumë besim dhe mbi të gjitha na lejoi që ta kemi fatin në dorë tonë”.
