Ndryshime sa i takon kastës drejtuese te Egnatia me Ndriçim Shtubinën që nuk do të mbajë më rolin e drejtorit sportive tek rrogozhinasit. Ish-futbollisti shkodran ishte në eksperiencën e tij të parë si drejtor sportiv, mirëpo me anë të një reagimi në rrjetet sociale bën të ditur se për të mirën e klubit vendos të tërhiqet.
Në fakt, Shtubina nuk i mbyll të gjitha dyert te Egnatia pasi sqaron se presidenti Agim Demrozi i ka ofruar një tjetër rol, për të cilin 35-vjeçarin i duhet të marrë kohën e tij dhe ta mendojë nëse do të mund ta pranojë si propozim.
Në reagimin e tij, Shtubina i uron suksese skuadrës ndërsa shton se është i bindur se Egnatia këtë sezon do të mund të kualifikohet në Kupat e Europës.
Në fakt, të besuarit e trajnerit Shpëtim Duro janë në rrugën e duhur pasi aktualisht renditen në vendin e tretë të klasifikimit.
