Vdekja e Gianluca Viallit i ka pikëlluar të gjithë. Ish-sulmuesi italian, lumturoi shumë njerëz me golat e realizuar si futbollist dhe frymëzoi të tjerë që vuajnë me betejën e gjatë që zhvilloi ndaj sëmundjes së keqe.
Gjithmonë plot kurajo, pozitiv dhe i buzëqeshur, por fundi ishte i trishte dhe erdhi në moshën 58-vjeçare. Bashkëshortja e tij, Cathryn White-Cooper po e vuan më shumë se të gjithë largimin e Viallit.
Të flasë e ka të vështirë, por gjithsesi ka dërguar një mesazh të shkurtër në GDS, aty ku nuk mungon një falënderim për të gjithë ata që e kanë mbështetur gjatë kësaj periudhe.
“Ai ishte një sportist shumë i talentuar, mbi të gjitha burri dhe babai më i dashur që ekzistonte. Jemi të shkatërruar! Faleminderit për gjithë dashurinë dhe mbështetjen tuaj të sinqertë”.
Gianluca dhe Cathryn (modele angleze me origjinë nga Afrika e Jugut) u njohën në Londër gjatë periudhës që sulmuesi aktivizohej me Chelsea. Raportin e tyre e kurorëzuan me martesë (2003). Çifti kishte dy vajza: Olivian dhe Sofian.
