Marash Kumbulla është lojtari që të gjithë trajnerët duan në ekipin e tyre. Një prospekt i shkëlqyer, i gatshëm për të dhënë gjithçka kur kërkohet, por mbi të gjitha një profesionist shembullor. Asnjë fjalë pa vend, gjithmonë i pari që vihet në dispozicion në stërvitje dhe në lojë, pavarësisht paraqitjeve të pakta dhe stolave të shumtë Marash vazhdoi të punojë në stërvitje, duke shpresuar për një debutim sezonal që në minutën e parë, i cili më në fund mbërriti në vitin 2023, fillimisht në Kupën e Italisë kundër Genoa, më pas në Serie A ndaj Fiorentinës.
Shifrat e tij kanë qenë më se pozitive, nga duelet në mbrojtje (62% të suksesshme), te goditjet (67%), topat e ndërprerë (15) dhe ato të rikuperuar (12). Dy paraqitje më se të mjaftueshme, që e kanë bërë të pandjeshme mungesën e Smalling kundër ligurianëve dhe të Ibanez kundër toskanëve. Me pak fjalë, kur Mourinho e hodhi në “luftë”, ai nuk u përmbajt dhe ishte gati. Pavarësisht edhe disa problemeve fizike.
Sepse pak minuta para ndeshjes kundër Genoa, Kumbulla ka pësuar një mikrothyerje të gishtit në dorën e majtë, e cila e ka detyruar të luajë me një fashë të dukshme. Lëndimi nuk e cënoi performancën e tij dhe Mourinho donte ta uronte të dielën në mbrëmje, në fund të lojës: “Marash është një profesionist i vërtetë.
Nëse mund të flitet për një hierarki, për momentin është i treti si mbrojtës qendror, por ka luajtur dy ndeshje të cilësisë më të lartë. Një ditë do të jemi pa Smalling, një tjetër pa Mancini dhe Kumbulla do të japë gjithmonë një përgjigje pozitive. Ai është një djalë që punon shumë mirë. Edhe pse luan pak, ka mundësi të bëjë mirë”.
Qendërmbrojtësi shqiptar punon shumë dhe qëndron i fokusuar. Ai nuk mendon për merkaton, pavarësisht se disa klube janë të interesuara. Kumbulla e di që Roma po mbështetet tek ai për të ardhmen dhe gjithmonë ka një qëndrim pozitiv. “Ne morëm në shtëpi tri pikë themelore për rrugëtimin tonë. Vazhdo kështu, Roma”, – ka shkruar shqiptari në rrjetet e tij sociale.
Në shkurt do të mbushë 23 vjeç, mosha është në anën e tij dhe së shpejti do të ketë mundësi të reja për të luajtur sërish titullar. E rëndësishme është që më në fund i ka lënë pas dëmtimet, që ia kanë komprometuar rrugën në këtë pjesë të parë të sezonit.
Mancini dhe Smalling janë paralajmëruar… Mes rotacioneve dhe kartonave, ish-mbrojtësi i Veronës do të gjejë sërish hapësirë për ta treguar veten; të rritet dhe të demonstrojë se mund të jetë një vlerë e shtuar për Romën. Përveç të qenit një profesionist i shkëlqyer.
