Nicolo Zaniolo drejt Premier Leagues. Pas thyerjes me Romën dhe dështimit të negociatave me Milanin, sulmuesi italian ka pranuar idenë e kalimit te anglezët e Bournemouth, të vetmit që kanë paraqitur një ofertë konkrete te Roma.
Sipas mediave italiane, Zaniolo ka autorizuar agjentin e tij që të negociojë për pagën dhe kohëzgjatjen e kontratës me klubin e Premier Leagues, për të përshpejtuar largimin nga kryeqyteti italian.
Ndërkohë, akordi mes Romës dhe Bournemouthit është arritur tashmë për 30 milionë euro, plus 5 të tjera në formë bonusi dhe 15 % të vlerës në rast rishitjeje në të ardhmen.
Këto shifra kënaqin jo pak verdhekuqtë, pasi Zaniolo ka kontratë deri në verën e 2024-ës dhe ka refuzuar të gjithë ofertat për rinovim, teksa së fundi ka dalë hapur duke refuzuar edhe grumbullimin me ekipin.
