Çështja Roma-Zaniolo po shkakton shumë diskutime. Lojtari duket se ka refuzuar të luajë, por njëkohësisht ka refuzuar edhe shitjen e tij te Bournemouth, skuadër që ka bërë një ofertë të pasur për të.
Tifozët kanë dalë kundër tij duke ekspozuar edhe një mesazh të ashpër në zonën e Koloseut. Tani, kritika për futbollistin e ri të verdhekuqve ka ardhur nga një ish-lojtar historik.
Po flasim për ish-mbrojtësin e Italisë dhe Milan-it, Billy Costacurta, i cili nuk i ka kursyer kritikat për Zaniolo-n dhe sjelljen e tij:
“Besoj se është e papranueshme nga ana e atyre që i qëndrojnë afër dhe i duan të mirën ta shtyjnë të bëjë hapa të caktuar sepse vetëm dëmtojnë karrierën e tij”, ka thënë për Sky Sport.
“Më duket me të vërtetë i pashpjegueshëm qëndrimi i Zaniolo-s, sepse vetëm po e përkeqëson situatën e tij dhe nuk e kuptoj pse duhet ta bëjë këtë.
Po flasim për një djalosh të datëlindjes ’99 që ka pësuar dëmtime serioze dhe që mund të rikuperohet akoma”.
Do të shohim se si do të përfundojë kjo çështje, por premisat nuk janë aspak të mira. Kujtojmë se edhe Milan-i ishte në garë për Zaniolo-n, por është tërhequr në momentin e fundit.
