Carlo Ancelotti u ndie i kënaqur me fitoren e radhës që e regjistroi Real Madridi.
“Los Blancos” e mposhtën Elchen dhe e ngushtuan distancën e Barcelonës në tetë pikë në La Liga.
Trajneri italian thotë se mbretërit e Spanjës kanë nevojë për fitore të njëpasnjëshme, pra për vazhdimësi, në mënyrë që t’i arrijnë objektivat që ia kanë vënë vetes.
“Ishte një lojë e bukur, e kontrolluar mirë.
E menaxhuam mirë gjysmë orën e fundit, kishim shumë raste dhe e kontrolluam mirë lojën për t’i evituar kundër zbritjet.
Shkoi mirë, në një moment të rëndësishëm të sezonit.
Nevojitet vazhdimësi e lojës dhe kjo lojë na bën mirë në këtë aspekt”, deklaroi “Don Carlo” për mediumin spanjoll “AS”.
Kampionët e Spanjës, të Evropës dhe të Botës fituan me rezultat 4:0 mbrëmë, pak ditë pasi triumfuan në Botërorin e Klubeve.
Madrilenët, edhe pse kanë mbetur prapa Barçës në La Liga, ende shpresojnë që ta mbrojnë titullin e kampionit, ndërsa janë në garë që të triumfojnë prapë edhe në Ligën e Kampionëve.
