Xavi Hernandez po e udhëheq me sukses Barcelonën në eksperiencën e tij të parë të rëndësishme dhe me peshë si trajner.
Trajneri katalunas është lider i padiskutueshëm i La Ligas, ndërsa po mundohet të ketë sukses edhe në Ligën e Evropës me ekipin e tij.
Para duelit të sontëm me Manchester Unitedin, Xavi është pyetur për një mundësi eventuale që ta marrë në dorë ndonjë klub anglez në të ardhmen.
“Nuk ka mundësi të mendoj për këtë, nuk është diçka që e mendoj bile në këtë fazë”, deklaroi Xavi.
“Unë vetëm sa kam filluar në Barcelonë. E kam atë ndjesi se mundësia për t’iu bashkuar Barçës më erdhi shumë herët, është diçka e madhe”, shtoi trajneri spanjoll.
Xavi synon ta drejtojë sa më gjatë të jetë e mundur Barcelonën dhe të arrijë suksese të mëdha si trajner me klubin e zemrës, njëjtë siç kishte bërë kur ishte lojtar.
