Sezoni i Liverpool-it vazhdon të jetë mjaft i komplikuar.
Pas humbjes së thellë 5-2 të pësuar në shtëpi kundër Real Madrid në Champions League, që u lë të kuqve shumë pak shpresa për të kaluar në çerekfinale, ka ardhur edhe një barazim pa gola në Selhurst Park ndaj Crystal Palace.
Një rezultat që e largon skuadrën e Klopp gjithnjë e më shumë nga vendet e para në Premier League dhe që nënvizon në mënyrë mjaft të pamëshirshme atë që të gjithë e përkufizojnë tashmë si një krizë të vërtetë.
Dhe faktin që gjermani nuk është më shumë në formë e tregojnë edhe intervistat, të cilat po bëjnë që tifozët e kuqve të humbasin durimin.
Duke folur për SkySports pas ndeshjes, trajneri i Liverpool-it fajësoi formën e ekipit të tij dhe rezultatet e dobëta me kalendarin e ngjeshur. “Nëse luan tri herë në javë apo dy herë bën një ndryshim të madh”, shpjegoi gjermani, duke theksuar se Palace kishte pasur më shumë kohë për t’u përgatitur për ndeshjen.
E vërtetë, por është hera e parë në vitet e fundit që kuqezinjtë e vuajnë kaq shumë situatën. Sezonin e kaluar, për shembull, Liverpool luajti çdo ndeshje në dispozicion, duke arritur në finale në çdo kompeticion, duke fituar edhe FA Cup dhe Carabao Cup dhe ende duke arritur të shkojë pikë për pikë me Manchester Cityn në Premier League.
Pra, siç tregon Sportbible, shumë besojnë se kjo fjali është thjesht një justifikim. Një nga shumë, thotë dikush në Twitter, sepse gjermani nuk është i ri me deklarata të ngjashme.
Deri në atë pikë sa disa tifozë janë ngopur tashmë.
“Ai ka një justifikim për gjithçka, unë kam filluar të mendoj se edhe justifikimet e tij kanë justifikime”, komenton dikush. “Mendoj se Klopp është vërtet i bindur se Liverpool është skuadra e vetme që luan kaq shumë ndeshje”, tha dikush tjetër.
Megjithatë, ky nuk është rasti, siç thekson një përdorues: “Ai vazhdon të qajë, por Manchester United ka luajtur vazhdimisht çdo tro ditë që nga përfundimi i Kupës së Botës”.
Dhe Djajtë e Kuq nuk duket se kanë të njëjtën rënie si skuadra e Klopp, i cili sigurisht jeton momentin më të komplikuar të historisë së tij të gjatë në Anfield.
