Marash Kumbulla ka qenë shumë i çuditur nga vendimi i gjyqtarit Mikael Fabri i cili ndëshkoi me karton të kuq në fundin e pjesës së parë të ndeshjes së Serisë A ndaj Sasuolos.
Portalet pranë klubit romanist, kanë zbuluar se futbollisti ka qenë i pakënaqur dhe i është drejtuar gjyqtarit menjëherë sapo ky i ka treguar të kuqin.
Kumbulla ishte i acaruar se Berardi në atë moment e ka goditur me shkelm, e më pas ka ardhur reagimi i tij duke goditur sulmuesin e Sasuolos i cili ishte i shtrirë në tokë.
“Më goditi ai i pari me shkelm dhe ti më jep të kuqin mua?!”, ishte reagimi i çuditur i Kumbullës në ato momente sipas “vocegiallorossa.it”.
Megjithatë, gjyqtari ka gjykuar vetëm veprimin e Kumbullës dhe jo atë të sulmuesit të kombëtares italiane, duke i treguar mbrojtësit shqiptar kartonin e kuq.
