Siç raporton “Sky”, situata e Silvio Berluskonit është delikate. Ai është shtruar dje në spitalin “San Raffaele” dhe është në kushte kritike. Nuk ka ende një buletin zyrtar mjekësor të paktën deri sot paradite ku mjekët do të duhet të japin një version zyrtar të situatës.
Problem me oksigjenimin për ish-presidentin e Milanit, për shkak të një problemi të mëparshëm të pazgjidhur. Nëse ky problem vazhdon, mund të çojë në lodhje kardiovaskulare dhe madje edhe pulmonare.
Simptomat, raporton korrespondenti i “Sky”, janë ato të pneumonisë, edhe pse mund të mos jetë pneumoni. Sidoqoftë, panorama klinike nuk është aspak e mirë dhe 86-vjeçari vijon të jetë në monitorim të rreptë nga mjekët e spitalit të njohur milanez.
Në fakt, 86-vjeçari ishte në klinikë edhe disa ditë më parë për një kontroll rutinë, teksa mjekët bëjnë me dije se gjendja e ishkryeministrit është e qëndrueshme për momentin.
Ai është një emër i njohur në politikën italiane, pasi ka qenë për shumë vite kryeministër dhe aktualisht drejton forcën politike “Forza Italia”, ndërkohë në botën e futbollit u bë i njohur si president i Milanit për shumë vite, duke fituar një numër të madh trofesh me kuqezinjtë.
