Skuadra shqiptare, Voska Sport e Ohrid, po marshon drejt elitës së futbollit të Maqedonisë së Veriut.
Voska e ka mposhtur me rezultat 2:1 Vardarin, në takimin që u zhvillua në Ohër.
“Fitore për infarkt në ndeshjen derbi ndaj Vardarit.
Edhe pse ekipi ynë kishte disavantazh deri në minutën e 90-të, pas një goli të pranuar në fundin e pjesës së parë, falë dy golave të shënuar në kohën shtesë, në fund regjistruam fitore 2:1.
Pa dyshim është kjo fitorja më e ëmbël e këtij sezoni, pasi na afron edhe më shumë drejt Ligës së Parë, që njëherit ishte dhe mbetet qëllimi kryesor i skuadrës sonë.
Përkundër dominimit të plotë gjatë pjesës së parë, një pakujdesi në mbrojtjen tonë, bëri që Vardari në pushim të shkojë me epërsi minimale.
Megjithatë dëshira e madhe për fitore bëri që skuadra të besoj deri në fund, ndërsa e gjithë kjo dha rezultatin e duhur në minutat shtesë të takimit.
Fillimisht Alen Jasharovski barazoi shifrat me golin e shënuar në minutën e 91-të, kur mjaft mirë shfrytëzoi pasimin e Arlind Alitit dhe nga afërsia shënoi për 1:1, derisa në minutën e 93-të, Ermedin Adem shënoi golin e fitores.
Ishte ky goli i parë i shënuar për shkupjanin, dhe me siguri goli më me vlerë për skuadrën tonë, pasi fitorja ndaj rivalkit të drejtëpërdrejtë për vendin e parë, Vardarin, na shpien drejtë Ligës së Parë.
Ishte kjo fitorja e 19-të sezonale për skuadrën tonë, që tashmë numëron 62 pikë, 4 më shumë se Gostivari i vendit të dytë, derisa Vardari me 56 pikë, tashmë renditet në pozitën e tretë”, shkruan në faqen e FC Voska Sport.
