Reali i Madridit ka pësuar një humbje të turpshme të martën në La Liga, teksa u mund në Katalonjë nga Girona me shifrat 4:2.
Ajo ishte një humbje që u la një shije të hidhur të gjithëve. Për më shumë akoma trajnerit, Carlo Ancelotti, i cili nuk e ka fshehur zhgënjimin e tij.
Pas ndeshjes, italiani deklaronte se nuk kishte fjalë për të shpjeguar atë çfarë ndodhi në Girona.
Duke ruajtur etikën e komunikimit, Ancelotti u kërkoi ndjesë tifozëve madrilenë për atë humbje.
Por ndërsa në publik ka ruajtur “fytyrën”, në dhomat e zhveshjes, trajneri i Realit ka qenë tepër i nxehur me skuadrën.
Ai nuk ka kursyer askënd. Gazeta spanjolle “AS” ka bërë me dije se Karleto është treguar i prerë: “Ai që luajti ndaj Gironës nuk ishte Reali i Madridit, ishte vetëm një kopje e shëmtuar.
Ajo çfarë ndodhi në Girona nuk dua të përsëritet më”. Shumë i qartë italiani, për më shumë në një moment vendimtar të sezonit.
