Nëse Dzeko “hakmerret”, Lukaku duhet të riniset.
E gjitha kjo përballë një Simone Inzaghi të lumtur, që është i llastuar për zgjedhje në momentin vendimtar të sezonit.
Në një sulm që rrotullohet rreth Lautaro Martinez, protagonistit të sezonit më të mirë në karrierë për sa iu përket golave dhe asisteve (31), belgu dhe boshnjaku po luftojnë për një fanellën titullari në ndeshjet e fundit vendimtare.
Kjo vlen duke filluar me transfertën e radhës në “Olimpico”, themelore për sa i përket renditjes, pastaj derbin e parë gjysmëfinal të Ligës së Kampionëve, planifikuar për të mërkurën. Për “Big Rom”, i cili deri më tani ka përjetuar një sezon evropian si aktor mbështetës, ndeshja kundër Romës mund t’i vlejë gjithashtu fanellën e titullarit katër ditë më vonë kundër kuqezinjve. Dhe jo vetëm…
HIERARKIA – Që nga momenti i rikthimit bindës, pas një pjese të parë të sezonit të shënjuar me dëmtime dhe një rikuperim të lodhshëm pas Kupës së Botës, hierarkitë e trajnerit nga Piacenza janë bërë mjaft të qarta: belgu është rikthyer për të kompletuar “LuLa” në Serie A, ku ka grumbulluar 10 paraqitje si startues në 11 sfidat e fundit. Në Champions League ishte Dzeko, ai që krijoi partneritet të përhershëm me argjentinasin, duke rezervuar vetëm 100 minuta në fushë për “Big Rom”.
Sigurisht që belgu nuk do ta kishte problem të rikthehej në një mbrëmje evropiane si protagonist, pas pjesëve të lojës me të cilat duhej të kënaqej në 1/8 finale dhe çerekfinale, por mjaftueshëm për të shënuar dy gola shumë të rëndë kundër Portos dhe Benfikës (të dy në ndeshjet e para).
RRITJA – Dëshira nuk ka munguar asnjëherë, forma është thuajse optimale. Ndërkohë i është rikthyer edhe ajo ndjesi me golin, mjaft e dobësuar në dimër. Numri personal i “Big Rom” në 16 ndeshjet e fundit është 7 gola dhe 4 asiste, të gjitha të kalitura me paraqitje gjithnjë e më bindëse edhe nga pikëpamja e lojës dhe pjesëmarrjes.
Dopieta ndaj Empolit dhe dy asistet ndaj Lazios në dy ndeshjet e fundit flasin për një sulmues të lëmuar, i cili në Romë ka mundësinë t’i tregojë Inzaghit se meriton një shans si startues edhe në Euroderbin e së mërkurës. Rasti, gjykuar nga të mëparshmit, është i favorshëm për Lukakun, i cili ka bërë gjithmonë mirë kundër verdhekuqve, duke grumbulluar tri barazime dhe një fitore, të kompletuara me gola dhe asiste në vitin e titullit.
E ARDHMJA – Aksionet për belgun janë veçanërisht të larta sepse në horizont ka edhe një të ardhme ende për t’u përcaktuar. Pas dëshirave personale dhe vlerësimit që gëzon në klubin zikaltër, “Big Rom” e di se për momentin skenari më i mundshëm parashikon rikthimin e tij në Londër, në fund të marrëveshjes së huazimit të dakorduar verën e kaluar midis Chelsea dhe Interit.
Por loja është e hapur… Gjatë javës, CEO i zikaltërve, Beppe Marotta, nënvizoi edhe një herë “dashurinë e belgut për këtë klub dhe ndjenjën e tij të përkatësisë”, duke folur për “parakushte të rëndësishme që shkojnë paralelisht me ato teknike dhe konkurruese”.
Megjithatë, shifrat e pagës së tij janë të larta dhe e panjohura mbetet e lidhur me trajnerin e ri të bluve, gjë që mund të ndryshojë planet e londinezëve. Nuk ka dyshim se loja për të ardhmen e belgut është ende e hapur. Ndërkohë, ai mund të dërgojë një tjetër sinjal të rëndësishëm nga “Olimpico”.
