Sot në mbrëmje, në “Bernabeu” luhet ndeshja e parë gjysmëfinale e Champions League mes Real Madrid dhe Manchester City.
Një sfidë mjaft interesante mes dy ekipeve që edhe vjet u përballën në këtë turne, me madrilenët që arritën një kualifikim të rëndësishëm, duke fituar trofeun.
Gjithsesi, dy nga yjet e futbollit botëror si Wayne Rooney e Luis Figo, mendojnë se këtë sezon historia do të flasë për kampionët e Anglisë. Rooney, për “The Times”, shprehet: “Manchester City jo vetëm që do ta mundë Real Madrid në këto dy gjysmëfinale, por do ta shtypë me këmbë”.
“Edhe mund të gabohem, por mendoj se City është në një nivel tjetër. Unë nuk do të vija bast për Real Madrid, pavarësisht përvojës që ka në këtë turne. Mendoj se ky është viti i Manchester City”, tha Rooney.
Ndërsa Luis Figo, ish-lojtar i Real Madrid, u shpreh: “Shoh anglezët si favoritë. City i këtij viti është një ekip më i mirë se ai i vjetshmi, një nga ekipet më të mira në botë dhe ka përvojën e hidhur të vitit të kaluar mbi supe.
Mendoj se Pep është favorit ndaj Ancelotti edhe pse kur luan në Madrid, historia e këtij klubi në Champions mund të bëjë diferencën”.
