Në orën 21:00, në mitikun “Stadio Olimpico” të Roma-s, vendasit “verdhekuqë” do të presin “aspirinat” e Bayer Leverkusen, në sfidën e parë gjysmë-finale të UEFA Europa League, me djemtë e teknikut Jose Mourinho që do të kërkojnë triumfin mbrëmjen e sotme.
Përsa i përket formacioneve, tekniku portugez ka vendosur të përdorë formulën 3-5-2, për rreshtimin e djemve të tij, me portën që si zakonisht mbrohet nga “luzitani”, Rui Patrico.
Në mbrojtje janë vendosur Roger Ibanez, Cristante e Mancini, me Spinazzola e Zeki Celik që do të vijnë në ndihmë nga krahët e mesfushës. Në qendër janë vendosur Bove, Matic e kapiteni Pellegrini, ndërsa sulmi i është besuar dyshes Belotti-Abraham.
Në krahun tjetër, tekniku Xabi Alonso ka vendosur t’i kundërpërgjigjet ish-trajnerit të tij, me formulën 3-4-2-1, ku në portë si zakonisht është vendosur finlandezi Hradecky. Mbrojtja me tre përbëhet nga Kossonou, Tapsoba e Jonathan Tah.
Në krahët e mesfushës janë pozicionuar Frimpong e Hincapie me Andrich e Palacios që mbulojnë qendrën. Para tyre janë vendosur “super yjet” e “aspirinave”, Florian Wirtz e Moussa Diaby, ndërsa “maja” e sulmit i është besuar çekut, Adam Hlozek.
