Qendërmbrojtësi Egzon Bejtullai ditën e diel do ta luajë ndeshjen e fundit për Shkëndijën.
Me përfundimin e sezonit atij i përfundon kontrata me kuqezinjtë dhe drejtuesit e Shkëndijës nuk kanë shfaqur asnjë interesim për vazhdimin e bashkëpunimit.
Kujtojmë që Bejtullai është pjesë e Shkëndijës që nga viti 2013, teksa që atëherë ka patur vetëm një shkëputje të shkurtër prej 6 muajsh në vitin 2020 kur luajti në Suedi për ekipin Helsingborg.
Në ndeshjen para 10 ditësh ndaj Makedonija GjP, Bejullai e luajti ndeshjen e 300-të për Shkëndijën, me fanellën e së cilës Bejtullai ka fituar 3 herë titullin kampion i Maqedonisë së Veriut dhe 2 herë trofeun e Kupës.
Ai po ashtu me përfaqësuesen e Maqedonisë së Veriut ishte pjesë e Kampionatit Evropian EURO 2020.
Akoma nuk dihet se ku do të vazhdojë karrierën Bejtullai, por nuk është sekret se klubet e Superligës shqiptare, Tirana dhe Partizani që prej kohësh kanë shfaqur interesim për shërbimet e tij.
