Një vit tjetër i pasuksesshëm për PSG.
Vetëm titulli në Ligue 1 (ende nuk është fituar zyrtarisht) është shumë pak për një klub që ka në përbërje emra të mëdhenj si Mbappe, Messi e Neymar.
Christophe Galtier, trajneri aktual i parisienëve, po vihet gjithnjë e më shumë në pikëpyetje.
Kanë dalë në skena emrat e disa kandidatëve, përfshirë Mourinhon, për të pasuar marsejezin.
Në horizont shfaqet figura e Thiago Mottas, një tjetër alternativë që bordi po shqyrton për merkaton e ardhshme të verës.
Italiano-braziliani është i dëshiruari nga Nasser Al Khelaïfi.
Një vit më parë, pak para shkarkimit të Pochettinos,
Al Khelaifi e kontaktoi për të qenë zëvendësuesi i argjentinasit në pankinë. Gjithsesi, fjalën e fundit e tha Luis Campos, falë afërsisë së këtij të fundit me Mbappenë (e bindi të firmoste rinovimin e kontratës).
Motta, sipas “L’Équipe”, është një nga favoritët për të pasuar Galtier, megjithëse negociatat ende nuk janë intensifikuar, sepse askush nuk e di se kush do ta thotë fjalën e fundit kur bëhet fjalë për emërimin e trajnerit të ri.
Campos dëshiron Mourinhon, ndërsa Al Khelaifi Mottan.
Ky i fundit ndihet gati për të marrë frenat e skuadrës pariziene, pas një periudhe të parë të frytshme në kryeqytetin francez në drejtimin e U-19.
Ai ka një avantazh ndaj kandidatëve të tjerë: e njeh dhomën e zhveshjes si futbollist, pasi ka qenë pjesë thelbësore e ekipit të drejtuar nga Laurent Blanc për tri sezone.
