Gjermania 2024 nuk mund të konsiderohet më një ëndërr, por një objektiv real, me Shqipërinë që po i bën gjërat si duhet në kualifikueset e kampionatit europian.
Kuqezinjtë i kaluan me sukses dy ndeshjet e qershorit, duke mundur Moldavinë në shtëpi dhe Ishujt Faroe në transfertë, rezultate që e “katapultuan” kombëtaren shqiptare në vendin e dytë me 1 pikë pas Çekisë pas 3 ndeshjesh të luajtura.
Rezultatet e fundit, por mbi të gjitha loja e treguar, jep besim dhe shpresë se kjo skuadër ka shanse reale për të arritur në finalet e europianit verën e ardhshme.
Sylvinho i ka dhënë një tjetër fytyrë skuadrës, që arrin të krijojë raste, të shënojë, të ketë ide loje dhe frymën fituese, shkruan ss.Kuqezinjtë luajnë fatin e kualifikimit ndaj dy rivalëve që konsiderohen si më të fortët e grupit.
Më 7 shtator, Shqipëria viziton Pragën, ku ndeshet me skuadrën kryesuese të grupit, Çekinë.
Tre ditë më vonë skuadra e Sylvinhos pret në shtëpi Poloninë, kundërshtar ndaj të cilit nis pjesa e dytë e kualifikueseve.
Çekia ka mundur Poloninë dhe Ishujt Faroe, por ka barazuar me Moldavinë, që është surpriza e këtij edicioni.
Polakët në krahun tjetër i gëzohen vetëm 3 pikëve me Shqipërinë në shtëpi, ndërkohë janë mundur nga Çekia dhe Moldavia e në shtator ka mundësinë e fundit për të shpresuar.
Dy kundërshtarë që do të jenë barometri i vërtetë për Shqipërinë, që duhet të tregojë të njëjtën fytyrë si në ndeshjet e qershorit, për të rivalizuar me Çekinën në transfertë, e më pas të marrë hak ndaj Polonisë e t’i nxjerrë këta të fundit nga gara për Europianin.
