Flamurtari i Prishtinës ka reaguar në lidhje me zhvillimet e fundit dhe e ka quajtur Kuvendin fiktiv që është mbajtur ditë më parë.
Në faqen zyrtare të këtij klubi shkruan se nuk do të lejojnë zhvillimin e asnjë kuvendi zyrtar pa praninë e të gjithë themeluesve.
Nga ana tjetër dje doli informacioni se kryetar i kuvendit të klubit është zgjedhur Nazif Gashi, kryetar i bordit Fadil Ismajli dhe drejtor ekzekutiv Bashkim Hasani.
Në faqen zyrtare ky kuvend quhet fiktiv.
“Klubi futbollit KF Flamurtari SHPK dëshiron të komunikojë me tifozët e tij të dashur, si dhe me publikun në përgjithësi, lidhur me një çështje të rëndësishme që ka dalë në dritë ditët e fundit.
Informacione të ndryshme kanë mbërritur në klubin tonë rreth disa të ashtuquajtura kuvende fiktive, të cilat, sipas pretendimeve, po organizohen në Prishtinë.
Klubi ynë dëshiron të bëjë të ditur se ky komunikim do të jetë i pari dhe i fundit nga ana jonë deri në marrjen e vendimit përfundimtar nga gjykatat e vendit tonë.
Ne dëshirojmë të theksojmë se nuk do të lejojmë zhvillimin e asnjë kuvendi zyrtar pa praninë e të gjithë themeluesve të klubit, dhe mbi të gjitha, pa shumicën e themeluesve.
Është e rëndësishme që proceset e vendimmarrjes në klubin tonë të jenë të drejta, transparente dhe të sigurojnë mbështetjen e gjerë të themeluesve tanë të nderuar.
Klubi ynë, KF Flamurtari, dëshiron të rikujtojë tifozëve të vet dhe opinionit publik se jemi një klub i lidhur ngushtë me vlerat e ndershme, integritetin dhe pasionin ndaj futbollit.
Jemi të vendosur të veprojmë në përputhje me rregullat dhe parimet e përcaktuara, dhe të mbrojmë interesat e klubin tonë dhe të tifozëve tanë.
Ne urojmë që kjo situatë të zgjidhet në mënyrë të drejtë dhe në përputhje me parimet e drejtësisë. Kërkojmë që vendimi përfundimtar i gjykatës të jetë i bazuar në fakte dhe të garantojë integritetin e KF Flamurtari.
Në fund, dëshirojmë të falënderojmë tifozët tanë të zemrës, kuq e zi, për mbështetjen e tyre të palëkundur dhe pasionin e tyre të pashuar ndaj klubin tonë. Bashkërisht, do të vazhdojmë të përfaqësojmë KF Flamurtari me krenari dhe zell në të ardhmen.
Për informacione reale ju lutem të na ndiqni në rrjetet tona sociale zyrtare”, reagon KF Flamurtari SHPK.
Çfarë tha krahu tjetër dje?
“Pas 5 viteve ‘luftë’ të kuvendarëve të klubit më në fund u arrit që KF Flamurtari t’i kthehet Statusi i cili u tentua t’i tjetërsohet nga persona të pandërgjegjshëm”, tregon zyrtari i klubit, Bashkim Hasani për gazetën kombëtare “Bota sot”.
Bordi Ekzekutiv përbëhet nga Fadil Ismajli - kryetar, Bahtir Emini, Visar Nallbani, Kushtrim Ismajli, Abedin Hasani, Nazif Gashi, Rexhep Fona, Gëzim Sveçla, Lulzim Canolli, anëtar!
Këtë bord nuk e njeh Flamurtari SHPK.
