Medon Berisha është një nga emrat që po monitorohen me vëmendje nga trajneri i kombëtares shqiptare, Silvinjo. Fantazisti kuqezi, që tani pjesë e kombëtares Shpresa, ka shkëlqyer me ekipin e të rinjve të Leçes, duke i ndihmuar që të shpallen kampionë në këtë grupmoshë në Itali.
Paraqitjet e tij sigurisht që kanë tërhequr edhe vëmendjen e skuadrës së parë të klubit italian, me trajnerin D’Aversa i cili e ka grumbulluar menjëherë për fazën përgatitore të edicionit të ri dhe i ka dhënë hapësira që në ndeshjen e parë miqësore.
Sot, Leçe luajti me US Postal miqësoren e parë të fazës përgatitore dhe në pjesën e dytë të ndeshjes, trajneri aktivizoi edhe Berishën.
Ky i fundit iu përgjigj siç duhej kësaj mundësie që iu dha, pasi shënoi në minutat 59 dhe 72 të duelit që u mbyll me rezultatin e thellë 15-1 për ekipin e Serisë A.
