Klubi i Buduçnostit nga Podgoica ka bërë të ditur se ka ndryshuar trajner, pak ditë para fillimit të sezonit të ri e sidomos pjesëmarrjes në Ligën e Konferencës ku kampionët e Malit të Zi përfunduan pasi u eliminuan që në eliminatoret e Ligës së Kampioneve.
Mlladen Milinkoviq, ish-trajneri i Luftëtarit dhe Kukësit, është ulur në stolin e kampionëve të Malit të Zi, ku kishte qenë edhe më parë duke fituar titullin në vitet 2020 dhe 2021.
Milinkoviç kthehet përsëri në drejtimin e kësaj skuadre bashkë me drejtorin sportiv Andrija Delibashiç, duke synuar që të nisin një cikël të ri fitues për malazezët.
Këta të fundit vendosën për ndryshimin pasi nuk kanë bërë mirë në aventurën europiane ku u turpëruan nga islandezët e Breidablik duke u mposhtur me shifrat 5-0 në paraeliminatoret e Champions.
Milinkoviç do të jetë në drejtimin e skuadrës që nga kjo mesjavë, teksa të mërkurën udhëton drejt Ohrit për sfidën e parë ndaj Strugës së Shpëtim Duros në turin e dytë të Ligës së Konferencës.
