Drita, që shkoi direkt në raundin e dytë kualifikues të Ligës së Konferencës, do të takohet sot me Viktoria Plzenin.
“Intelektualët” ndeshjen e parë e luajnë si mysafirë sonte në “Doosan Arena”, me fillim prej orës 19:00
Në prag të kësaj ndeshje në konferencën për media u paraqiten Akis Vavalis dhe Rron Broja.
Trajneri i Dritës u shpreh: “Do të përballemi me një kundërshtar të fortë, një skuadër që ka histori të madhe, që luan thuajse në çdo vit në faza grupore të skenës evropiane.
Vitin e kaluar, kjo skuadër pati shumë suksese dhe shumë skuadra të mëdha kanë hasur në vështirësi kur janë përballur me Viktorian. Ne e respektojmë Viktorian shumë dhe ajo është favorite në këtë ndeshje”.
Tutje, trajneri grek shtoi: “Drita po luan në çdo vjet në skenën evropiane dhe ka shfaqur ndeshje të mëdha. U ka shkaktuar probleme skuadrave kundërshtare.
Duke marrë për bazë këtë, presim njësoj që edhe Viktoria Plzenit t’i shkaktojmë probleme.
Do të mundohemi të japim më të mirën.
Të shfaqim ndeshje të fortë dhe të mundohemi të marrim rezultat të mirë për ndeshjen kthyese”.
Ndërsa, Broja deklaroi: “Jemi munduar që ta analizojmë kundërshtarin sa më shumë që kemi mundur.
E dimë se Viktoria është skuadër shumë e mirë, por ne besojmë në vete dhe kemi punuar fort në përgatitjet parasezonale për këtë ndeshje. Kemi vetëbesim dhe besojmë se do të arrijmë diçka të enjten”.
