Struga Trim Lum shkëlqen në takimin e parë duke e mposhtur me rezultat 3:1 ekipin Hesperanges, në ndeshjen e parë të xhiros së tretë të kualifikueseve në Conference League në futboll.
Struga është një hap afër play-off-it në këtë garë. Heroi i struganëve është Besart Ibraimi, i cili ka shënuar tre gola, dy prej të cilëve nga penalltia.
Pjesa e parë e shkëlqyer e Strugës u kurorëzua me dy gola në rrjetën e mysafirëve nga Luksemburgu.
Besart Ibrahimi në minutën e 23-të, pas një loje të shkëlqyer të Radeskit dhe një gabimi të Çekanoviqit, arriti ta fusë topin në rrjetën e mysafirëve, 1:0.
Struga TL vazhdoi të dominojë dhe të shkaktojë probleme në mbrojtjen e Hesperanges dhe në minutën e 40-të rezultati 2:0 me golin e Ibraimit nga penalltia.
Në minutën e 46-të, Stolz ngushton rezultatin në 2:1.
Struga u lirua nga presioni dhe në minutën e 77-të Ibraimi nga penalltia thellon fitoren në 3:1.
Ndeshja e kthimit luhet më 17 gusht në Luksemburg.
