Cristiano Ronaldo është emëruar Lojtari më i mirë i muajit në Ligën Saudite për muajin gusht, pas një paraqitjeje dominuese nga sulmuesi i Al Nassr.
Sulmuesi 38-vjeçar mundi konkurrencën nga Igor Coronado (Al Ittihad), Riyad Mahrez (Al Ahli) dhe Malcom (Al Hilal) për çmimin prestigjioz pasi fituesi u shpall të enjten.
Ronaldo ka shkëlqyer këtë muaj për Al Nassr pasi pesë herë fituesi i Topit të Artë shënoi pesë gola dhe dha dy asiste në tri ndeshje.
Pasi nuk arriti të shënonte kundër Al-Taawooun, sulmuesi i Al Nassr shënoi një tregolësh kundër Al-Fateh dhe më pas erdhi një dygolësh kundër Al-Shabab në ndeshjen vijuese.
Kjo është hera e dytë që Cristiano Ronaldo fiton çmimin e lojtarit më të mirë të muajit në Ligën Saudite, pasi ai fitoi çmimin e tij të parë të tillë në shkurt.
Ndërkohë, shpresat e Cristiano Ronaldos për të luajtur sërish në Champions League, por këtë herë me Al-Nassr, janë shuar pasi UEFA përjashtoi pjesëmarrjen e ardhshme të klubeve të Arabisë Saudite në kompeticionin elitar europian.
Drejtuesi i kampionatit saudit Carlo Nohra kishte zbuluar më parë se ata po punojnë për të parë se si mund të bashkëpunojnë me UEFA-n për të lejuar ekipet saudite të luajnë në Champions.
Presidenti i UEFA-s, Aleksander Ceferin, kundërshtoi mundësinë që skuadrat e Arabisë Saudite të luajnë në kompeticionet e saj, duke hedhur poshtë raportet e mëparshme të mediave që kishin sugjeruar se ata mund të siguronin një pjesëmarrje në Champions League.
