Rumania – Kosova, ndeshja u ndërpre për rreth një orë në kualifikueset për Kampionatit Evropian në futboll.
“Kosovarët tërbohen, rumunët kërkojnë falje, UEFA hesht”, është titulli i mediumit zviceran “20min”.
“Në faqen e saj të drejtpërdrejtë të martën, UEFA i vlerësoi si “sjellje diskriminuese” veprimet e tifozëve rumunë që shkaktuan ndërprerjen e lojës në ndeshjen kualifikuese të Kampionatit Evropian në Bukuresht, mes mikpritësve Rumanisë dhe Kosovës.
Për shkak se ultrasit rumunë e shfaqen pankartën ku shkruante "Kosova është Serbi" dhe këndonin këngë pro-serbe, loja u ndërpre për rreth 45 minuta.
Tifozët rumunë nuk reshtin me fyerje ndaj kosovarëve me thirrje raciste.
Portieri i Kosovës Arijanet Muric iu përgjigj fyerjeve me një kapje provokuese të organeve gjenitale.
Njëjtë e bëri edhe portieri zëvendësues kosovar Samir Ujkani”, shkruan mes të tjera media zvicerane.
Portali rumun “Sport.ro” ka shkruar: “Pas këtij incidenti, ka shumë gjasa që ndeshja e radhës në shtëpi e Rumanisë kundër Andorrës të zhvillohet pa shikues”.
Sipas gazetarit rumun Emanuel Rosu, tifozët rumunë që mbanin pankartën kundër Kosovës u rrethuan dhe u identifikuan nga policia rumune pas ndeshjes.
Me çfarë pasojash të mëtejshme përballen ata tani mbetet e paqartë.
Rumania nuk e njeh pavarësinë e Kosovës!
