Drejtuesit e Federatës Gjermane të Futbollit kanë zgjedhur Julian Nagelsmann si trajnerin e ri të ekipit kombëtar. 36-vjeçari do të qëndrojë në pankinën e katër herë kampionëve të botës deri në fundin e Euro 2024.
Kompeticion që do të organizohet verën e ardhshme në Gjermani.
Sipas marrëveshjes së arritur me DFB, Nagelsmann do të përfitojë rreth 400 mijë euro në muaj. Kjo është hera e dytë radhazi që tekniku i talentuar zëvendëson Hansi Flick.
Në fillim te Bayern Munchen dhe tashmë në stolin e Gjermanisë. Me misionin dhe objektivin për të rikthyer “Pancerat” te loja e bukur dhe rezultat pozitive. Që gjatë viteve të fundit kanë munguar.
Përveç dështimit në Botërorin Katar 2022, skuadra kombëtare gjermane është paraqitur keq edhe në miqësore. Pesë ndeshjet e fundit kanë sjellë një barazim dhe katër humbje. Ecuri negative që solli edhe shkarkimin e Hansi Flick.
Tashmë nis epoka Nagelsmann, zgjedhje që është mirëpritur nga tifozët e zhgënjyer gjermanë. Të cilët besojnë se trajneri i ri do të zgjidhë problemet jo të pakta te Kombëtarja e tyre e dashur.
Që në Europianin që do të zhvillohet gjatë vitit të ardhshëm në shtëpi, mund dhe duhet të jetë një nga protagonistet kryesore.
