Analisti i emisionit “Favorit” në T7, Ismet Munishi, mbrëmë i ka komentuar deklaratat e trajnerit të Ballkanit, Ilir Daja, i cili u shpreh se ekipi Portokalli do të duhej që dy ndeshjet e mbetura, ndaj Dritës dhe Gjilanit, t’i zhvillojë në pjesën pranverore të sezonit, e jo këtë javë kur u mbyll pjesa e parë e edicionit 2023/24.
Sipas Munishit, hatri i një trajneri apo një ekipi nuk mund të bllokohet kampionati pasi prishet mbarëvajtja e tij, njëjtë siç kishte ndodhur në sezonin e kaluar.
Gjithashtu, Munishi mendon se Ballkani është dashur ta menaxhojë më mirë situatën, duke i pushuar lojtarët kryesorë në ndeshjen me Prishtinën dhe duke ua dhënë rastin lojtarëve të rinj pasi insiston se e vërejti një lodhje tek lojtarët e kampionit të Kosovës pas orarit të ngjeshur që e kishin gjatë këtyre muajve të fundit.
“Lojtarët e Ballkanit janë harxhuar fizikisht, emocionalisht prej garave evropiane, është problem çdo të tretën ditë të motivohesh, të jesh i qind për qindtë, për këtë punë futbolli është sporti numër 1 në botë. Po e shoh që po ankohet Ilir Daja, por s’mund ta ndalim kampionatin për Ilir Dajën ne se duhet të luhet futbolli. Po ankohet se pse mi kanë lënë lojtë kështu e pse ashtu… por, s’ka faj ai se e kanë mësuar keq vjet. Kur luante Ballkani në Evropë, orë policore bëhej tek ne, krejt duhet të pushonin. E tash s’po i pëlqen”, u shpreh Munishi.
“I ka 25 lojtarë, ka lojtarë që nuk kanë luajtur, futi ata në lojë. Kjo pikë me Prishtinën nuk i është dashur fare, si i futi lojtarët titullarë si jo, më mirë mos rreziko me t’u lënduar futbollistët. E pash, disa lojtarëve të Ballkanit nuk iu shkonin këmbët. Shtini lojtarët e rinj, ka lojtarë sa të duash, nëse edhe Ballkani ankohet në lojtarë, s’di ekipet tjera çka kanë me thon”, përfundoi trajneri kosovar.
