Raffaele Palladino u ndëshkua me karton të kuq në “Diego Maradona”, sfidë ku Monza e tij mori një pikë përballë kampionëve në fuqi të Napolit.
Trajneri 39-vjeçar do e ndjekë nga shkallët e stadiumit takimin në transfertë përballë Frosinones, e programuar për të shtunën në mesditë (SS2, 15:00).
“Personalisht e përjetoj shumë ndeshjen, e di se do të ndihem si një luan i mbyllur në kafaz… Por jam i vetëdijshëm që kam një staf të fortë.
Citterio dhe Peluso do të jenë në pankinë, ndërkohë që unë do të jem në kontakt të vazhdueshëm me djemtë e analizave të videove”, thekson Palladino.
“Viti 2024? Synimi ynë është ta bëjmë vitin e ri të paharrueshëm. Ne patëm një 2023 të mahnitshëm, duam të përsëritim veten. Kemi të gjithë kushtet për t’ia dalë mbanë”, thekson trajneri i Monzës, i cili bën një dallim tek ekipi kundërshtar.
“Kam patur kënaqësinë të njoh Mazzitellin (kapiteni i Frosinones), për të cilin mendoj se është një futbollist i nënvlerësuar. Sepse ai zotëron gjithçka.
Na pret një ndeshje e komplikuar në një fushë të vështirë. Ata janë një skuadër e strukturuar shumë mirë”, theksoi trajneri i Monzës, ekip që nuk fiton prej tri ndeshjesh.
Në fund merkato: “Kemi patur një takim me Gallianin dhe jemi në harmoni për gjithçka. Disa lojtarë kanë gjetur pak hapësirë dhe është e drejtë që të shkojnë dhe të luajnë diku tjetër. Sa i përket afrimeve, ne jemi 100% dakord”.
