Skënderbeu sërish me mbështetje financiare nga bashkia, këshilli bashkiak akordon 175 milion lekë.
Bashkia Korçë vijon të mbajë një peshë kryesore sa i takon mbështetjes me anë financiare te ekipi i Skënderbeut.
Në mbledhjen e fundit të këshillit bashkiak të Korçës, këshilltarët votuan unanimisht pro për rritjen e fondit që çdo vit bashkia i akordon bardhekuqve duke e kategorizuar në zërin “dieta dhe shërbime”.
Këtë vit me buxhetin e 2024 bashkia Korçë i ka akorduar klubit të futbollit Skënderbeu shumën prej 175 milionë lekësh të vjetra për 10 muaj aktivitet.
Një rritje e konsiderueshme krahasuar me vitin e mëparshëm kur korçarët luanin në kategorinë e parë kur fondi limit i akorduar nga bashkia ishte 137 milionë lekë të vjetër.
Në total janë 30 persona të regjistruar dhe në përputhje me listën e federimeve të dorëzuar në Federatën Shqiptare të Futbollit që do të përfitojnë pagesë mujore prej 575 mijë lekësh.
Në lidhje me pagesën nëpërmjet këtij fondi të dedikuar për ekipin e parë të klubit të futbollit Skënderbeu, bashkia Korçë merr përsipër pagesat për 10 muaj që lojtarët janë në aktivitet duke mos përfshirë dy muajt e pushimit gjatë verës kur kampionatet janë mbyllur.
Ndaj presidentit Ardjan Takaj që ka shumicën e aksioneve në klubin Skënderbeu vjen kështu një ndihmesë jo e vogël nga ana e bashkisë që mban një peshë te rëndësishme sa i takon pagave të futbollistëve dhe stafit. Vite më parë Skënderbeu në futboll arrinte të merrte edhe 500 milionë lekë në vit.
