FC Voska Sport tashmë disa ditë ndodhet në Ulqin të Malit të Zi, aty ku po zhvillojnë fazën kryesore të përgatitjeve në prag të stinorit pranveror.
Paralelisht me stërvitjet, që futbollistët po i kryejnë me shumë përkushtim, skuadra po zhvillon edhe ndeshje kontrolluese, përmes të cilave trajneri Miljan Radoviç, kërkon që të ketë një pasqyrë më të mirë rreth formacionit bazë.
Kundërshtarë i radhës ishte Adria nga Podgorica, ndaj së cilës skuadër regjistruan fitore 9:0.
Trajneri Radoviç në këtë ndeshje vendosi të pushojë 11-shen e parë që luajti në ndeshjen e para dy ditëve kundër Rudar Plevlja, duke inkuadruar në lojë kryesisht futbollistët e rinj të transferuar, por edhe ato nga shkolla e futbollit.
Pikërisht, njëri prej tyre, Emsal Rashid, u regjistrua në listën e golashënuesve përballë Adria, ndaj së cilës skuadër fjalën kryesore e patën Milos Açimoviç dhe Fatjon Jusufi, që shënuan nga tre gola, ndërsa nga një gol tjetër, përveç Rashidit, shtuan edhe Valentin Koçoski dhe Alban Shabani.
Ndeshjen e radhës në tokën malazeze do ta zhvillojnë kundër FC Bokelj, skuadër kjo që aktualisht garon në Ligën e Dytë malazeze, por që ndanë pozitën e parë me skuadrën shqiptare të Otrant Olympic, dhe që shihet si një ndër skuadrat pretendente për inkuadrim në elitën e futbollit të Malit të Zi.
