Trajneri i Kombëtares së Anglisë, Gareth Southgate e ka zbuluar se Ben White nuk dëshironte të konsiderohej për të qenë pjesë e lojtarëve të grumbulluar për miqësoret kundër Brazilit dhe Belgjikës.
Southgate e konfirmoi sot listën prej 25 lojtarëve të ftuar për ndeshjet miqësore këtë muaj, para se të thoshte se White e refuzoi ftesën e tij.
“Absolutisht është një pyetje që duhet ta bëni sepse bazuar në formë, nuk mund të ulem këtu dhe të them se ai nuk e meritonte të jetë pjesë e grumbullimit. Morëm një telefonatë nga Edu i cili tha se Ben nuk dëshironte që të konsiderohej pjesë e Anglisë në këtë kohë”, tha Southgate.
“Është një turp i madh, ai është një lojtar që më pëlqen shumë. Unë fola me të pas Katarit, sepse doja ta zgjidhja atë dhe kishte rezervë nga ana e tij. Nuk e di pse është kështu, por duhet ta respektoj këtë dhe dua t'ia lë derën hapur atij”, shtoi më tej Southgate.
