Premierliga vazhdon sonte (e mërkurë) me tri ndeshje interesante që janë në program për t’u zhvilluar, në kuadër të javës së 30-të.
Ndeshja e parë do të luhet mes Arsenalit dhe Luton Townit, në stadiumin “Emirates”, në orën 20:30.
“Topçinjtë” renditen të dytët në tabelë me 65 pikë, dy më pak se lideri Liverpooli (67), kurse Lutoni gjendet në zonën e rrezikshmërisë (18) me 22 sosh.
Skuadra e Artetës hyn në fushë pas barazimit që pati me Cityn 0-0, teksa me një fitore eventuale sonte merr kreun e tabelës përkohësisht.
Brentford – Brighton është ndeshja e radhës që do të zhvillohet në orën 20:30, në stadiumin “Gtech Community”.
Skuadra vendase është e 15-ta me 27 pikë, ndërsa ajo mysafire e nënta me 42 sosh.
Manchester City është nikoqir i Aston Villas në stadiumin “Etihad”. Takimi fillon në orën 21:00.
City hyn në këtë ndeshje pas barazimit 0-0 me Arsenalin dhe synon fitore për të vazhduar garën për titull, ku aktualisht renditet në vendin e tretë me 64 pikë.
Në anën tjetër, Aston Villa e sheh veten në vendin e katërt me 59 sosh.
